ආර්ථික අර්බුදයෙන් දැඩි ලෙස පීඩාවට පත්ව සිටින ශ්‍රී ලංකාවට උපකාර කිරීම සඳහා තම මාසයක වැටුප පරිත්‍යාග කරන බව ද්‍රවිඩ මුන්නේත්‍ර කසාගම් (ඩීඑම්කේ) ඉන්දීය පාර්ලිමේන්තුවේ මන්ත්‍රීවරු බ්‍රහස්පතින්දා ප්‍රකාශ කළහ.
මේ සඳහා රුපියල් කෝටියක් දැනටමත් ප්‍රකාශයට පත් කර ඇති අතර, ශ්‍රී ලාංකික ජනතාවට උපකාර කිරීම සඳහා පරිත්‍යාගයක් කරන ලෙස පාලක ඩීඑම්කේ නායක සහ තමිල්නාඩු මහ ඇමැති එම්කේ ස්ටාලින් කළ ඉල්ලීමකට අනුව මෙම පියවර ගෙන තිබේ.
ඩීඑම්කේ පක්ෂයේ ලෝක් සභා සහ රාජ්‍ය සභා මන්ත්‍රීවරුන් මසක වැටුප ප්‍රධාන අමාත්‍යවරයාගේ පොදු සහන අරමුදලට පරිත්‍යාග කරන බව එම පක්ෂය නිවේදනයක් නිකුත් කරමින් කියා සිටී.
ආර්ථික දුෂ්කරතාවලින් පෙළෙන ශ්‍රී ලාංකික ජනතාවට උපකාර කිරීම සඳහා ශ්‍රී ලංකාවට ආහාර වැනි අත්‍යවශ්‍ය ද්‍රව්‍ය මිලදී ගැනීමට සහ යැවීමට පරිත්‍යාග කරන ලෙස මහ ඇමැති ස්ටාලින් පසුගිය අඟහරුවාදා තමිල්නාඩු රජයෙන් ඉල්ලීමක් කිරීම විශේෂත්වයකි.