ශ්‍රී ලංකාවාසී ජනතාවට සහනාධාර රැගත් නෞකාව හෙට පිටත් වෙනවා
චෙන්නායි වරායේ සිට සහන ද්‍රව්‍ය රැගත් නෞකාව හෙට ශ්‍රී ලංකාවට එවීමට නියමිතයි.
ආර්ථික අර්බුදයෙන් ශ්‍රී ලංකාවේ ජනතාව විශාල ලෙස පීඩාවට පත්ව සිටිති. මෙම තත්ත්වය තුළ ශ්‍රී ලංකාවේ ජනතාවට සහය වීම සඳහා තමිල්නාඩු රජය වෙනුවෙන් ඖෂධ ඇතුළු අත්‍යාවශ්‍ය ද්‍රව්‍ය තමිල්නාඩුවෙන් එවන බව පළමු අමාත්‍ය එම්.කේ.ස්ටාලින් ව්‍යවස්ථාදායක සභාවේදී ප්‍රකාශ කළේය.
ඉන් අනතුරුව ශ්‍රී ලංකාවේ ජනතාවට නැව්ගත කිරීමට අවශ්‍ය සහල්, කිරිපිටි සහ ඖෂධ සකස් කිරීමේ කටයුතු ඉතා වේගයෙන් සිදු විය. මේ වන විට එහි වැඩකටයුතු අවසන් වෙමින් පවතින බැවින් සහන ද්‍රව්‍ය සියල්ල හෙට චෙන්නායි වරායෙන් ශ්‍රී ලංකාවට එවීමට නියමිතයි.
ඒ අනුව රුපියල් කෝටි 80ක් වටිනා සහල් ටොන් 40,000ක්, රුපියල් කෝටි 15ක් වටිනා කිරිපිටි ටොන් 500ක් සහ රුපියල් කෝටි 28ක් වටිනා ජීවිතාරක්ෂක අත්‍යාවශ්‍ය ඖෂධ වර්ග 137ක් රැගත් නෞකාවක් හෙට ශ්‍රී ලංකාව බලා පිටත් වේ.