ඩීසල් හිඟය හේතුවෙන් ලබන සඳුදා සිට ධාවනය කෙරෙන බස් රථ සංඛ්‍යාව සීමා කිරීමට ශ්‍රී ලංකා පෞද්ගලික බස් හිමියන්ගේ සංගමය තීරණය කර තිබෙනවා.
එම සංගමයේ සභාපති ගැමුණු විජේරත්න පැවසුවේ සඳුදා සිට පළමු සති දෙක තුළ බස් රථවලින් තුනෙන් එකක් පමණක් ධාවනය වන බවයි.
ඔවුන්ට ශ්‍රී ලංකා ගමනාගමන මණ්ඩලය හරහා ඩීසල් ලබා දෙන බවට පොරොන්දු වූ නමුත් එය නොසලකා හැරීම නිසා සේවා සීමා කිරීමට සිදුවන බව ඔහු පැවසීය.
මෙම බෙදා හැරීමේ ක්‍රියාවලියේ ගැටලු රැසක් පවතින බවද ඔහු සඳහන් කළේය.
බස්රථ 6000ක් පමණක් ධාවනය කෙරෙන බවත් ඒ අනුව බස් රථ කාලසටහනක් සකස් කරන ලෙසට නියෝගයක් නිකුත් කර ඇති බවත් ඔහු පැවසීය.
එකතු කළ අගය මත බද්ද ඉහළ දැමීම සහ බස් කර්මාන්තයට එල්ල වන බලපෑම හේතුවෙන් බස් රථ හිමියන් සඳුදා සේවයෙන් ඉවත් වන බව මීට පෙර නිවේදනය කර තිබුණි.
සඳුදා නව වාරය සඳහා පාසල් විවෘත වන බැවින් එම යෝජනාව අත්හිටුවීමට තීරණය කළ බව ඔහු වැඩිදුරටත් පැවසීය.