ඉන්ධන හිඟය: තේ කම්හල් හිමියන් දැඩි අර්බුදයක
විදුලිය විසන්ධි වීම සහ ඉන්ධන අර්බුදය හේතුවෙන් තමන් ගැටලු රැසකට මුහුණ පා සිටින බව දකුණු පළාත් තේ කර්මාන්ත ශාලාවේ හිමියෝ පවසති.
මෙම තත්ත්වය නිෂ්පාදන වියදම විශාල ලෙස ඉහළ යාමට හේතු වී ඇති බවත් තේ නිෂ්පාදනයේ දී තේ කර්මාන්ත ශාලා හිමියන් විශාල ගැටලුවලට මුහුණ පා සිටින බවත් ඔවුහු පෙන්වා දෙති.
ජනක යන්ත්‍ර භාවිතයෙන් තේ කර්මාන්තශාලා පවත්වාගෙන යාමට ඩීසල් ද අවශ්‍ය වන අතර ඩීසල් හිඟය බාධාවක් වී තිබේ. තේ කර්මාන්ත ශාලා හිමියන් පවසන පරිදි මෙම තත්ත්වය ගුණාත්මක තේ නිෂ්පාදනයට බාධාවක් වී තිබේ.
අමු තේ කුඩු සැපයුම අඩුවීම නිසා තේ කම්හල්වල ධාරිතාව අඩුවී ඇතැයිද තේ කර්මාන්ත ශාලා හිමියෝ පැවසූහ.
තේ කම්හල්වලට දර සපයන්නන් ද ඉන්ධන අර්බුදය හේතුවෙන් ගැටලු රැසකට මුහුණ පා සිටින බව තේ කර්මාන්ත ශාලා හිමියෝ පවසති.
ශ්‍රී ලංකාවේ තේ කර්මාන්ත හිමියන් පවසන්නේ ප්‍රවාහන වියදම් ඉහළ යාම සහ ඇසුරුම් ද්‍රව්‍ය, තේ පොහොර ඇතුළු අනෙකුත් යෙදවුම්වල මිල ඉහළ යාම හේතුවෙන් තේ කර්මාන්තයට දැඩි බලපෑමක් එල්ල වී ඇති බවයි