භූමිතෙල් මිල වැඩිවීමට වන්දි ගෙවීම සඳහා අඩු ආදායම්ලාභී පවුල්වලට සහ ධීවර හා වතුකරයේ අයට සහනාධාර ලබාදීමට රජය පොරොන්දු වී තිබේ.
අඩු ආදායම්ලාභී පවුල් සඳහා මුදල් සහනාධාර ලබාදෙන බව බලශක්ති අමාත්‍ය කාංචන විජේසේකර මහතා ඊයේ කැබිනට් මණ්ඩලයට දැනුම් දුන් බව අමාත්‍ය බන්දුල ගුණවර්ධන මහතා පැවසීය.
සතිපතා පැවැත්වෙන කැබිනට් මාධ්‍ය හමුවේදී ඔහු මේ බව පැවසීය.
එම යෝජනාව ඉදිරි සති කිහිපය තුළ ක්‍රියාත්මක කිරීමට නියමිතයි.
ඊයේ සිට ක්‍රියාත්මක වන පරිදි භූමිතෙල් ලීටරයක් රුපියල් 253කින් ඉහළ දමා තිබේ.
මේ අතර දැනට අස්වනු නෙලීමේ යෙදී සිටින ගොවීන්ට අතිරේක ඉන්ධන සංචිත ලබාදීම සම්බන්ධයෙන් බලශක්ති අමාත්‍යවරයා සහ කෘෂිකර්ම අමාත්‍යවරයා අද සාකච්ඡා කරන බව බන්දුල ගුණවර්ධන කියා සිටියා.
දැනටමත් ඇතැම් ප්‍රදේශවලට ඉන්ධන සංචිත යවා ඇති බව අමාත්‍ය කාංචන විජේසේකර මහතා පෙන්වා දෙයි.
අතිරේක ඉල්ලුම මත ඉදිරි දිනවලදී දිස්ත්‍රික් සහ ප්‍රාදේශීය ලේකම්වරුන් හරහා ඉන්ධන තොග යැවීමට කටයුතු කරන බව බන්දුල ගුණවර්ධන මහතා සඳහන් කළේය.