සමගි ජන බලවේගයේ පාර්ලිමේන්තු මන්ත්‍රී කුමාර වෙල්ගම මහතාගේ නායකත්වයෙන් යුත් නව ලංකා නිදහස් පක්ෂ මූලස්ථානය විවෘත කිරීමේ අවස්ථාවට එක්වූ 43 වැනි බළසේනාවේ නායක පාර්ලිමේන්තු මන්ත්‍රී පාඨලී චම්පික රණවක මහතා පැවසුවේ මැද මාවතක් නිර්මාණය කරන බවයි. අන්ත වාමාංශික හා අන්ත දක්ෂිනාංශික දේශපාලන පක්ෂවල සටන් පාඨවලට යට නොවී ස්වාධීන බලවේග පාර්ලිමේන්තුව තුළ ඒකරාශී කිරීම යුගයේ අවශ්‍යතාවය වී තිබේ.
ඊයේ (5) බත්තරමුල්ලේ පැවති උත්සවයකට එක්වෙමින් ඔහු මෙසේ පැවසීය: “අද අපට අන්ත වාමාංශික හා දක්ෂිනාංශික දේශපාලන පක්ෂවලින් සටන් පාඨ ඇසෙනවා. ඒ අතර පාර්ලිමේන්තුවේ සිටින ස්වාධීන බලවේග සියල්ල එකතු කරගෙන මැද මාවතක් ඇති කිරීමට උත්සාහ කළ යුතුයි. එබඳු බලවේග එකතු කර එවන් මාවතක් නිර්මාණය කිරීමට ජාතික නිදහස් පක්ෂයට හැකියාව, ශක්තිය, ධෛර්යය ලැබේවායි මම ප්‍රාර්ථනා කරමි.”
